علی امین گنڈاپور نے مریم نواز کو براہ راست چیلنجز دے دیئے

مریم نواز اپنے صوبے کے لوگوں کو خیبر پختونخوا جیسی بے مثال سہولیات دیں، وزیراعلیٰ خیبر پختونخوا 
خیبر پختونخواہ کے طلبہ کو لیپ ٹاپ دینگے،مریم نواز بھی اپنے صوبے میں صحت کارڈ شروع کریں،خطاب

 پشاور(بیورو رپورٹ)وزیراعلیٰ خیبر پختونخوا علی امین گنڈاپور نے وزیراعلی ٰپنجاب مریم نواز کو براہ راست چیلنجز دے دیے۔ علی امین گنڈاپور نے خیبر پختونخوا کے طلبہ کے لیے اہم فیصلہ کرتے ہوئے انہیں مفت لیپ ٹاپ دینے کا اعلان کیا  اور کہا کہ پنجاب کے جتنے فیصد طلبہ کو لیپ ٹاپ دیے جا رہے ہیں ہم بھی اتنے فیصد طلبہ کو مفت لیپ ٹاپ دیں گے اسی طرح وزیراعلیٰ پنجاب، کے پی حکومت کی طرز پر اپنے شہریوں کو مفت صحت کارڈ دے۔انہوں نے کہا کہ ہم نے اپنی پوری آبادی کو صحت کارڈ پلس دیا ، اب لائف انشورنس کی سہولت دے رہے ہیں۔ انہوں نے چیلنج کیا کہ پنجاب حکومت بھی اپنی پوری آبادی کو یہ سہولیات دے۔ علی امین گنڈاپور نے کہا کہ ہم نے مشکل حالات کے باوجود اپنی آمدن میں 55فیصد اضافہ کیا ہے، پنجاب بھی اپنی آمدن 12فیصد سے 55فیصد تک بڑھائے۔انہوں نے مزید کہا کہ خیبر پختونخوا حکومت کے پاس خزانے میں 176ارب روپے کا سرپلس پڑا ہے۔ خیبر پختونخوا واحد صوبہ ہے جس نے آئی ایم ایف کا ٹارگٹ حاصل کیا ہے ، باقی کسی دوسرے صوبے نے نہیں کیا۔ پنجاب کو آئی ایم ایف کی طرف سے 300ارب روپے سرپلس کا ہدف دیا گیا تھا، پنجاب حکومت نے الٹا 146ارب روپے کا  خسارہ کیا۔علی امین گنڈاپور نے کہا کہ ہم 4ہزار مستحق بچیوں کی شادیاں کروا رہے ہیں اور ہر بچی کو 2لاکھ روپے دے رہے ہیں۔ چیلنج کرتا ہوں پنجاب کی کارکردگی ہماری ایک فیصد کارکردگی کے برابر بھی نہیں، میں اس پر مناظرے کے لیے تیار ہوں۔