دہشتگرد قوم کو تقسیم کرنا چاہتے ہیں،ایسیعناصر کو ہر قیمت پر شکست دینگے، صدر مملکت

 کوئٹہ میں صدر مملکت آصف علی زرداری کی زیر صدارت امن و امان کی صورت حال پر اہم اجلاس ،چیئرمین پیپلزپارٹی بلاول بھٹو زرداری نے خصوصی شرکت کی

 صورتحال واضح ہے ریاست کو رہنا ہے، دہشتگردی کیخلاف جنگ جیتنی ہے ،لہٰذا انسداد دہشتگردی ونگ کو جدید اسلحہ فراہم کرینگے،بلوچستان دل کے قریب ہے، آصف علی زرداری

صوبے کی ترقی اور پائیدار امن چاہتے ہیں، بلوچستان کے ہر بچے کو اسکول میں دیکھنا چاہتے ہیں،جدید ٹیکنالوجی سے بچوں کو روشناس کروانا وقت کی ضرورت ہے،خطاب

 کوئٹہ(سٹاف رپورٹر)صدرمملکت آصف علی زرداری نے بلوچستان میں ترقی اور پائیدار امن پر زور دیتے ہوئے کہا ہے کہ دہشت گرد عناصر کو ہر قیمت پر شکست دیں گے۔کوئٹہ میں صدر مملکت آصف علی زرداری کی زیر صدارت امن و امان کی صورت حال پر اہم اجلاس منعقد ہوا جہاں چیئرمین پاکستان پیپلزپارٹی بلاول بھٹو زرداری نے  خصوصی شرکت کی۔وزیر اعلی بلوچستان میر سرفراز بگٹی نے اجلاس کو صوبے میں امن و امان کی صورت حال پر بریفنگ دی۔اس موقع پر صدر مملکت آصف علی زرداری نے بتایا کہ دہشت گرد عناصر کو ہر قیمت پر شکست دیں گے، دہشت گرد قوم کو تقسیم کرنا چاہ رہے ہیں۔انہوں نے کہا کہ صورت حال واضح ہے ریاست کو رہنا ہے، دہشت گردی کے خلاف جنگ جیتنی ہے لہذا انسداد دہشت گردی ونگ کو جدید اسلحہ فراہم کریں گے۔صدر مملکت کا کہنا تھا کہ بلوچستان دل کے قریب ہے، صوبے کی ترقی اور پائیدار امن چاہتے ہیں، بلوچستان کے ہر بچے کو اسکول میں دیکھنا چاہتے ہیں۔ان کا کہنا تھا کہ جدید ٹیکنالوجی سے بچوں کو روشناس کروانا وقت کی ضرورت ہے۔اجلاس میں قائم مقام گورنر بلوچستان کیپٹن (ر)عبدالخالق اچکزئی،  چیف سیکریٹری بلوچستان شکیل قادر خان،  آئی جی پولیس معظم جاہ انصاری سمیت اعلی حکام نے شرکت کی۔